科記遊園地: 2012

我的初馬．奈良(十五) - 後記．噴口水篇

開始跑步的初期純粹係為左減肥，呢個願望有夠單純吧...

咁我唔係弱到一個圈都跑唔完，但開始嘅時候真係二個起三個止。

到開始可以一口氣完成六公里(呢個人係唔係傻，自己跑得六公里竟然妄想跑完42.195)，我問自己可以完成全馬嗎?

咁我當時其實只係五月份，我就好勇咁去報左名參加。

初時真係10K都跑唔完，真係有少少擔心，都慢慢可以10->11->12....

跟住第一次跑到15公里.......居然隻腳會痛都行唔郁...

開始上網SEARCH D資料同埋問下身邊跑過馬拉松嘅意見....

都開始好認真咁練20->25->30...一直加上去...我發現左

(1)馬拉松完全唔係淨係跑咁簡單，係同自己嘅身體及極限鬥智鬥力嘅遊戲..

我而家其實都冇足夠能力一口氣跑完全程，完全唔停嘅話我最叻果次32KM。咁我唔否認係勉強完成..係事實，所以我要身體鬥智又或者妥協先可以完成整個馬拉松。今次我大約23K已經停左，係因為我已經FEEL到左腳有好輕微抽筋，所以就拉下筋(順便休息一下)..
而且我都冇足夠儲存嘅能量，所以中途一定要飲健康飲料、食蕉蕉去補充能量...不過奈良人好熱情，中途有糖果派已經小兒科...仲有檸檬茶、紅豆沙、仲有面豉湯飯.
所以事前係要去理解自己嘅身體點樣運作，同埋飲水位呀之類...
我嘅策略好簡單，因為我嘅目標係六小時完成(一般馬拉松都有時間限制，超時就要俾人趕上車冇得再跑)，所以就係留力留力留力，留到最後先放力衝線(我最後都追過成十幾人架XD)...最後雖然只係核核突突跑5小時28都算係對自己有所交代..

(2)要訓練幾耐呢...

呢個係問題非常艱深，咁我用自己經驗答就會話半年。一星期起碼練跑三次，有PLAN地加操(10%10%加)但如果真係跑完腳痛就一定要有足夠休息。
小弟嘛，我一去到20K之後就一口氣加至25..30...32...最後就係全程...。不過從來都唔係一次成功.....我就20K完成三次25K三次先試之後...
同埋我係幸運兒，真係未試過抽筋抽到跑唔到....所以真係唔知點樣去MANAGE抽筋嘅問題..

(3)咁你係唔係真係減到磅架..

唔....減左12磅...我希望可以再減多最少20....(大家可想而知我幾重XD)不過呢自從跑開步我真係發現，原來仲食多左野..咁無計啦之後我會跑完唯有唔食...

(4)有冇秘技呢...

我咁屎有咩秘技，不過我都會贈有意想馬拉松嘅人兩句，第一就係全力以赴，少少痛苦真係一定要去面對。但係第二真係唔好勉強，跑完廿幾卅K腳痛少不免。唔好即刻第二日又話再跑30K，起碼都休番一兩日...當然呢兩句野適用好似我呢D只係一心諗住完成嘅人啦..

我的初馬．奈良(十四) - 回去．是為了吃炸豬篇

去RINKU TOWN另一個好處就係有巴士去番關西空港，100 YEN就可以喇...

我每次都想問點解關西長期都咁少人....?

但成個商場就只有呢間吸引到我嘅注意....

咁辛苦挨完個馬拉松，係時候食D唔肥死你唔得嘅野.....

今次就見到呢間KYK....

好特別有芥末八爪魚....

炸豬尚算不錯...但和幸真係LEGEND....又平又好味...

今年第三次踏足大阪.....終於要離去喇.....

正常嘅飛機餐....

落左地唔知點解....又整左個味千拉面....唔敢影相...廢事俾你地笑XD....

我的初馬．奈良(十三) - OUTLET又來了篇

晨早起身，飲個早茶先...

本來都係諗住周圍行下啦...之但係條心齋橋我今年都行左三次....

所以都要諗下新地方....咁最後都係要諗OUTLET，咁RINKU TOWN(佢有個中文名叫臨空城)呢度存在左咁耐...

一於殺過去....!!!

(網上圖片)

一貫OUTLET嘅風格....

但係我呢排先知原來OUTLET係有兩個BRAND...

一個係三井另一個就係RINKU TOWN呢個PREIMUM OUTLET..

外表其實係完全睇唔出有咩分別..

呢條就係行到我死死下嘅樓梯......你知啦我岩岩跑完隻腳好痛行到好似機械人咁...

呢個就係長期都有1000 YEN件衫同裙嘅舖頭，係咩名..?得閒自己黎睇下啦XD.....

可以俾個提示大家...係日本牌子香港都有SHOP...

最後我都放低唔少...因為佢有一個令人好心動嘅牌子....做緊七折.....!!!

但又係唔係每一個OUTLET都咁正呢...?唔係囉.........

我的初馬．奈良(十二) - 炸雞雞初體驗篇

呢個炸雞真係見到好多次，我又係時候身痕寫下食評..

咁同埋佢又講埋自己係用國產雞肉嘛......吸引力當然滿分....

其實佢有好多分店，我記得涉谷都有添.....仲排晒長龍...

最後我地買左一份黎試...結果係....其實我覺得如果俾香港人做或者台灣豪大大雞排之類..

佢地會比較識得運用香料去令到D味更加突出...可惜呢個雞雞好冇乜調味......所以有少少晒左...

我的初馬．奈良(十一) - 感謝．一路上有你們篇

短短三DAY的行程，我除左見識日式馬拉松的威力之外，最估唔到就係...

話說最後一天，我地先係去左大丸附近果間LORETTIA食「早餐」..

其實都唔早喇成十一點幾，因為我地見到個好吸引嘅蝦包....

裡面真係一粒粒蝦架......不過就有一位幾親切嘅服務員....一直咁解釋呢個餐有D乜乜物物....

你識日文咩科生......岩喇....佢係講國語嘅...從口音聽應該係內地人....

咁當然喺食店我都經常聽到國語(無論係內地或者台灣人)，不過我係第一次撞到香港人..

上次咪話說唔再幫襯本店嘅，竟然撞到真真正正嘅香港人梁生...

7

咁我梗係貫徹我八卦嘅本性...又問下佢呢又路咁...

我八卦地問左佢幾$人工呀之類...(900YEN個鐘一個星期最多做廿八個鐘日本政府規定)又或者係要讀到幾高日文先好黎之類....(佢話係N2)

講下呢到多唔多香港人呀之類...佢話唔算多..

幾長嘅「蟹柳」...!!!!

多謝梁生俾一次我地可以用廣東話噴口水嘅機會..!!

其實之前已經有BLOG友講過CROSS HOTEL OSAKA有位香港人喺度做野...

咁我好幸運又見到果位姐姐....人地姓陳嘅..

不過我就真係好耐未試過講「唔該我想CHECK OUT」...又有人同我講「麻煩你簽收」..「多謝晒....」...

真係未試過喺酒店RECEPTION同人用廣東話溝通喎.......

你地就好似喺我身邊支持我一椒，多謝!!!

我的初馬．奈良(十) - 奈良照相館篇

跑完之後我都冇乜力水影相，咁就不如慢慢講番跑完做到D乜啦....

其實臨衝線之前，大會嘅「吉祥物」有森裕子小姐竟然仲喺終點同我地呢D大落後嘅人GIVE ME FIVE

之後嘛就攞「完成版」毛巾同埋獎牌...再加埋兩隻蕉同埋唔多好味嘅健康飲品(咸嘅...)

然後就黎呢度攞張完成證書喇.....!!